Om Hornindal

Med eit areal på om lag 190 km2 og eit folketal på rundt 1200, er kommunen ei av dei minste i fylket. I vest ligg Hornindalsvatnet, vel 50 km2, den største innsjøen på Vestlandet, og den djupaste i Europa - 514 m djup.

Frå kommunesenteret Grodås i austenden av vatnet går eit breitt og ope dalføre 14 km austover til Møre grense. Dalen har vore ein viktig gjennomfartskorridor mellom dei to nabofylka, også Den Trondhjemske postvegen gjekk gjennom Hornindal. Hornindal er ikkje så trong og vill som ein del andre dalar i Indre Nordfjord, men liknar meir på ein open austlandsdal. Frå dalbotnen går liene slakt over i fjella ikring.

Fleire mindre dalføre skjer seg ut frå hovuddalen og gjev rom for seter- og hyttegrender. Lagleg terreng og gode snøtilhøve skaper gode mulegheiter for tur- og skiaktivitetar.

Folkesetnaden i kommunen finn ein i hovuddalføret og langs vatnet, særleg då langs Kjøsapollen, ein sidearm av Hornindalsvatnet.